nafas nafas men tira ehtiram le ke chale
jahan jahan bhi chale tera naam le ke chale
ruḳh-e-sabih pe lahra.i hain siyah zulfen
tulu-e-sub.h men vo husn-e-sham le ke chale
samajhta kaun baharon ke in isharon ko
vo ek ham the jo mahfil men jaam le ke chale
ba-nam-e-pir-e-mughan tishna-lab rahe barson
ab ek daur hamara bhi naam le ke chale
vufur-e-shauq men apna to ab ye aalam hai
ki dil men yaad tiri lab pe naam le ke chale
qadam qadam pe ‘qamar’ un ki yaad aa.i hai
zahe nasib gham-e-na-tamam le ke chale
Leave a Reply