Charkh Chinioti
be-ḳhudi men hai na vo pi kar sambhal jaane men hai
lutf pa-e-yar par jo laghzishen khane men hai
tere va.ade teri yaden tere naghme tere ḳhvab
husn se bharpur daulat mere kashane men hai
saghar-o-mina men lahrati hai har mauj-e-sharab
ik javani ka talatum aaj maiḳhane men hai
bazm-e-duniya men hain husn-o-ishq yuun jalva-numa
raushni hai sham.a men to soz parvane men hai
mai ki ik ik buund se tufan-e-masti hai ayaan
kis ki mai-bar ankhḌiyon ka aks paimane men hai
nuur ki barish abhi hone de thoḌi der aur
ik zara si der hi to raat Dhal jaane men hai
laakh fitrat ne dikha.i barq ki chashmak-zani
us men vo shoḳhi kahan jo tere sharmane men hai
jaan bhi dil bhi jigar bhi arzu-e-vasl bhi
un ke pesh apna sabhi kuchh aaj nazrane men hai
mai ubhar kar jaam men angḌa.iyan lene lagi
kaisa madd-o-jazr saaqi tere maiḳhane men hai
‘charḳh’ main na-ashna huun hijr ke mahaul se
vasl ka rangin pahlu mere afsane men hai
Leave a Reply