rok de us ko bhala kis ki majal aata hai
har taraqqi ke ta.aqub men zaval aata hai
larza-angez sahi tamkanat-e-taḳht-e-shahi
lek jab arsh-e-mua.alla ko jalal aata hai
ek dil pyaar bhara sab ke liye laaya huun
na mujhe aur koi fan na kamal aata hai
main ne murshid se dua chahi to hans kar ye kaha
pyaar ghar chhoḌ ke jaata hai jo maal aata hai
jab ye uftad paḌi mujh pe samajh men aaya
ek shishe ki tarah dil men bhi baal aata hai
naag ka zahr bhi shirin hai zara yaad rahe
sar-e-mimbar koi nau-shina maqal aata hai
dekhte ja.iye same.a nazar aane ke nahin
anjuman men vo koi ḳhair-sagal aata hai
sitam ijad na kar ai sitam-ijad bahut
tere sar kitni hi naslon ka vabal aata hai
donon paida to khanakti hui miTTi se hue
taal par tum ko mujhe qaal pe haal aata hai
dil to phir dil hai miyan zehn bhi qaabu men kahan
jis ko chaho ki na aa.e vo ḳhayal aata hai
ab to panghaT ki vo doshiza talasho jis ko
na bhar aata hai na mashkiza sambhal aata hai
ik majanin ki duniya hai ye jadu-nagri
bas ye dekho ki kise sehr-e-halal aata hai
ḳhud-farebi to hain mushtaq ki is dast men kab
asman rang-e-fusun-saz-e-shaghal aata hai
muntazir baiThe hain ham bhi ki pa.e dad-e-ghazal
zaigham aata hai koi koi ghazal aata hai
hansne vaale kahin kuchh soch ke rone na lagen
bazm men ‘kausar’-e-ashufta-ḳhayal aata hai
Leave a Reply