jab vaj.h-e-sukun-e-jan Thahar jaa.e
phir kaise dil-e-tapan Thahar jaa.e
manzil ki musafiro na puchho
mil jaa.e jise jahan Thahar jaa.e
allah-re ḳhiram-e-naz un ka
ik baar to asman Thahar jaa.e
kya janiye qafila vafa ka
luT jaa.e kahan kahan Thahar jaa.e
ye raat ye TuTti umiden
allah ye karvan Thahar jaa.e
hai mauj men ‘saif’ kashti-e-dil
ma.alum nahin kahan Thahar jaa.e
Leave a Reply