sag-e-laila ke naqsh-e-pa hain ham
yaani majnun ke rahnuma hain ham
kyuun na ho dushmanon ke ghar matam
dost ke kushta-e-jafa hain ham
tum ko dil ki bhi hai kasu ke khabar
dil men khush ho ki dil-ruba hain ham
jis qadar ham ko samjhiye be-qadr
qadr men us se bhi siva hain ham
kyuun na mitti kharab ho apni
is kharabat ki bina hain ham
kis se rakhiye ghubar ai ‘maruf’
ek aalam ki khak-e-pa hain ham
Leave a Reply