adnan-mohsin

Taza Phul Sajaen Kyun Hum Kamre Ke Gul-Danon Mein

taaza phuul sajaen kyuun ham kamre ke gul-danon men

teri khushbu shamil hai rozana ke mehmanon men

kaisi kaisi basti ujdi ahl-e-khirad ke hathon se

divanon ne shahr basae ja kar registanon men

apne aansu dafn hue hain aankh ki giili qabron men

apni chikhen qaid rahi hain zehnon ke zindanon men

us ke ruup ki dhuup ka saaya chhanv bichhate pedon par

us ki shokh hansi ka charcha shahr ke qahva khanon men

dhund to ponchhi bhi ja sakti hai chashme ke shishon se

vaqt ki raakh padi rahti hai thanDe atish-danon men

pairon se takrate hain jab jhonke sard havaon ke

haath larazne lag jaate hain chamde ke dastanon men

tanhai ka bhari patthar ek zara sa sarka hai

kadiyon ki avaz padi hai ik qaidi ke kanon men

More Poems

Leave a Comment