ham apne dukh ko gaane lag ga.e hain
magar is men zamane lag ga.e hain
kisi ki tarbiyat ka hai karishma
ye aansu muskurane lag ga.e hain
kahani ruḳh badalna chahti hai
na.e kirdar aane lag ga.e hain
ye hasil hai miri ḳhamoshiyon ka
ki patthar azmane lag ga.e hain
ye mumkin hai kisi din tum bhi aao
parinde aane jaane lag ga.e hain
jinhen ham manzilon tak le ke aa.e
vahi rasta batane lag ga.e hain
sharafat rang dikhlati hai ‘danish’
ka.i dushman Thikane lag ga.e hain
Leave a Reply