baja.e ham-safri itna rabta hai bahut
ki mere haq men tiri be-zarar dua hai bahut
thi paanv men koi zanjir bach ga.e varna
ram-e-hava ka tamasha yahan raha hai bahut
ye moḌ kaaT ke manzil ka aks dekhoge
isi jagah magar imkan-e-hadsa hai bahut
bas ek chiḳh hi yuun to hamen ada kar de
muamla hunar-e-harf ka juda hai bahut
miri ḳhushi ka vo kya kya ḳhayal rakhta hai
ki jaise meri tabi.at se ashna hai bahut
tamam umr jinhen ham ne TuuT kar chaha
hamare hathon unhin par sitam hua hai bahut
zara chhua tha ki bas peḌ aa gira mujh par
kahan ḳhabar thi ki andar se khokhla hai bahut
koi khaḌa hai miri tarah bhiiḌ men tanha
nazar bacha ke miri samt dekhta hai bahut
ye ehtiyat-kada hai kaḌe usulon ka
zara se naqs pe ‘bani’ yahan saza hai bahut
Leave a Reply