Rajinder Manchanda Bani
din ko daftar men akela shab bhare ghar men akela
main ki aks-e-muntashir ek ek manzar men akela
uḌ chala vo ik juda ḳhaka liye sar men akela
sub.h ka pahla parinda asman bhar men akela
kaun de avaz ḳhali raat ke andhe kuen men
kaun utre ḳhvab se mahrum bistar men akela
us ko tanha kar ga.i karvaT koi pichhle pahar ki
phir uḌa bhaga vo saara din nagar bhar men akela
ek maddham aanch si avaz sargam se alag kuchh
rang ik dabta hua sa puure manzar men akela
bolti tasvir men ik naqsh lekin kuchh haTa sa
ek harf-e-mo’tabar lafzon ke lashkar men akela
jaao maujo meri manzil ka pata kya puchhti ho
ik jazira duur uftada samundar men akela
jaane kis ehsas ne aage nahin baḌhne diya tha
ab paḌa huun qaid main raste ke patthar men akela
hu-ba-hu meri tarah chup-chap mujh ko dekhta hai
ik larazta ḳhub-surat aks saghar men akela
Leave a Reply