Kuchh Nahin Likkha Hua Phir Bhi paDha Jata Hai Kya

kuchh nahīñ likkhā huā phir bhī paḌhā jaatā hai kyā

aisī nā-maujūd ko duniyā kahā jaatā hai kyā

ham-suḳhan tere muḳhātab kā patā kaise karūñ

bolnā thā kyā tujhe aur boltā jaatā hai kyā

ek darvāza aur andar duur tak koī nahīñ

aate jaate jhāñk lene se tirā jaatā hai kyā

is añdhere meñ paḌe ik shaḳhs ko dekhā kabhī

paañv se Takrā.e to bāñhoñ meñ aa jaatā hai kyā

ham idhar haiñ hashr uThā dete haiñ jab uThtī hai lahr

tum udhar ho haath uThā do sab sunā jaatā hai kyā

maiñ ki terā tīsrā ġham huuñ so ye ġham bhī to kar

tū ki bas hone na hone par marā jaatā hai kyā

Leave a Comment