Akhtar Saeed Khan
lab-e-sukut pe ik harf-e-be-nava bhi nahin
vo raat hai ki kisi ko sar-e-dua bhi nahin
ḳhamosh rahiye to kya kya sada.en aati hain
pukariye to koi muḌ ke dekhta bhi nahin
jo dekhiye to jilau men hain mehr-o-mah-o-nujum
jo sochiye to safar ki ye ibtida bhi nahin
qadam hazar jihat-ashna sahi lekin
guzar gaya huun jidhar se vo rasta bhi nahin
kisi ke tum ho kisi ka ḳhuda hai duniya men
mire nasib men tum bhi nahin ḳhuda bhi nahin
ye kaisa ḳhvab hai pichhle pahar ke sannaTo
bikhar gaya hai aur ankhon se chhuTta bhi nahin
is izhdiham men kya naam kya nishan ‘aḳhtar’
mila vo hans ke magar mujh se ashna bhi nahin
Leave a Reply