Poet
miri lau lagi hai tujh se gham-e-zindagi miTa de
tira naam hai masiha mire dard ki dava de
miri pyaas baḌh rahi hai mira dil sulag raha hai
jo nahin hai jaam saaqi to nigah se pila de
mira mudda.a hai itna tu agar kare gavara
main faqir-e-astan huun mujhe bandagi sikha de
mujhe shauq-e-bandagi men yahi ek aarzu hai
tira naqsh-e-pa jahan ho mira sar vahin jhuka de
mujhe dekh kar pareshan kya kahega ye zamana
main bhaTak raha huun dar dar mujhe aa ke aasra de
tira jaam jam-e-kausar tira mai-kada hai jannat
mire haal pe karam kar miri tishnagi bujha de
jise aap chahte the vo ‘fana’ hai ab kafan men
koi ja ke aaj un ko zara ye ḳhabar suna de
Leave a Reply