Poet
kisi ki yaad men be-kal rahi hai
vo ik laḌki jo ankhen mal rahi hai
kisi ki raah ko itna taka tha
hamari aankh barson shal rahi hai
chhupa to li hai apni pyaas ham ne
magar jo chiḳh andar pal rahi hai
kisi ne paanv se zanjir bandhi
kisi ke paanv men paa.el rahi hai
magar sach hai ki ik surat kisi ki
hamari aankh ka kajal rahi hai
koi avaz mujh men gunjti thi
hamesha mujh men ik halchal rahi hai
basa rahta hai mujh men shor kaisa
ye kaisi aag mujh men jal rahi hai
main dhaḌen maar kar jo hans rahi huun
miri vahshat bhi us ko khal rahi hai
tumhari yaad ik lohe ki kanghi
musalsal haDDiyon par chal rahi hai
Leave a Reply