Saleem Shahid
zulmat hai to phir sho.ala-e-shab-gir nikalo
ḳhurshid koi shab ka jigar chiir nikalo
kaTta hai kabhi naḳhun-e-angusht se kohsar
patthar na kuredo koi tadbir nikalo
main gul huun mujhe shaḳh pe khilna hai ba-har-taur
tum ḳhaak se gul-ḳhezi ki tasir nikalo
tum roghan-e-ḳhun burrish-e-shamshir se bhar kar
jo chaho mire jism se tasvir nikalo
jo zehn men tha ḳhvab men dekha hai vahi kuchh
jo chaho ab is ḳhvab ki ta.abir nikalo
ye shahr-e-shikasta hai na.e shahr ki buniyad
ik taaza dar-o-bam ki ta.amir nikalo
auraq-e-shab-e-rafta siyah honge magar tum
is baab se ye surḳhi-e-tahrir nikalo
Leave a Reply