maqam-o-ab hue saath saath sharminda
hai karbala jo pasheman furat sharminda
lahu men Duub ke mazlum surḳh-ru nikle
salib-e-vaqt pe zalim ki zaat sharminda
jab ik jihat se chala tiir nanhe bachche par
us ek pal men hue shash-jahat sharminda
kahan hai shimr ko taufiq sharmsari ki
magar hai ḳhanjar-e-qatil ki dhaat sharminda
giren jo kaT ke vahi sar-buland hain baazu
jo tiir mashk pe khinchen vo haath sharminda
lahu-luhan shahidon se sharmsar vo din
vo bibiyon ke khule sar ki raat sharminda
hain sar jhuka.e hue lafz lafz nauhon ke
bayan-e-marsiya ki baat baat sharminda
yazid-o-shimr-o-amar aur bin-ziyad kahan
siva.e hur ke hui sab ki zaat sharminda
fana ke aḳhiri lamhe talak husain mire
rahegi gham men tire ka.enat sharminda
Leave a Reply