Sultan Akhtar
nafas nafas iztirab men tha
main halqa-e-sad-itab men tha
sabhi nazare nazar men gum the
ki saara manzar hijab men tha
paḌha to kuchh bhi na haath aaya
likha bahut kuchh kitab men tha
lahu ki aahaT pe chaunk uTTha
vo muddaton jaise ḳhvab men tha
dilon men raushan na.i kahani
purana qissa kitab men tha
bas ik hunar tah-ba-tah munavvar
bas ik suḳhan intiḳhab men tha
main us ki ḳhushbu men gum tha ‘aḳhtar’
vo mere gham ke hisab men tha
Leave a Reply