tira ghurur-e-abas intiha.i sat.h pe hai
bulandi par bhi vahi hai jo khaa.i sat.h pe hai
phalang sakta huun jitna hai do dilon ke beach
magar jo fasla jughrafiya.i sat.h pe hai
mujhe nahin hai zara ranj tah-nashini ka
mujhe ḳhushi hai chalo mera bhaa.i sat.h pe hai
ham aise dekhne valon ka koi dosh nahin
ki zer-e-sat.h kasafat safa.i sat.h pe hai
ye kis hunar se kiya tum ne ḳhud ko sair ai dost
ki duudh pi bhi liya aur mala.i sat.h pe hai
Leave a Reply