Siraj Ajmali
ye taghayyur ru-numa ho ja.ega socha na tha
us ka dil dard-ashna ho ja.ega socha na tha
nit na.e ragon ki thi jis saz-e-hasti se ummid
vo bhi be-saut-o-sada ho ja.ega socha na tha
yuun sarapa iltija ban kar mila tha pahle roz
itni jaldi vo ḳhuda ho ja.ega socha na tha
vo ta.alluq jis ko donon hi samajhte the mazaq
is qadar ba-qa.eda ho ja.ega socha na tha
jis ‘siraj’-e-ajmali se thiin ummiden be-shumar
vo bhi nazr-e-vah-va ho ja.ega socha na tha
Leave a Reply