Kis Bharose Pe Nikalta Ghar Se Bahar Main Akela

Nisar Nasik

kis bharose pe nikalta ghar se bahar main akela

char-su uThe hue hathon men patthar main akela

maslahat-zadon ki naav sahilon par ja lagi hai

rah gaya sailab men pisar-e-payambar main akela

mere parcham par miri rusva.i ki tahrir hai

dushmanon se ja mila hai mera lashkar main akela

main ye kis ku-e-hirasan men huun tasvir-e-saval

sab khaḌe hain apne hi sayon se lag kar main akela

sahn men aahaT hai koi aur na chhat par chaap hai

shaam hai aur be-dili ki siḌhiyon par main akela

mujh se bahar zindagi azadiyan abadiyan

aur is tarik se kamre ke andar main akela

sab ke a.amalon ki ‘nasik’ lag chuki hain qimaten

rah gaya huun ab sar-e-bazar-e-mahshar main akela