aftab-hussain

Munafiqat Ka Nisab Padh Kar Mohabbaton Ki Kitab Likhna

munafiqat ka nisab padh kar mohabbaton ki kitab likhna

bahut kathin hai khizan ke mathe pe dastan-e-gulab likhna

main jab chalunga to regzaron men ulfaton ke kanval khilenge

hazar tum mere raston men mohabbaton ke sarab likhna

firaq mausam ki chilmanon se visal lamhe chamak uthenge

udaas shamon men kaghaz-e-dil pe guzre vaqton ke baab likhna

vo meri khvahish ki lauh-e-tishna pe zindagi ke saval ubharna

vo us ka harf-e-karam se apne qubuliyat ke javab likhna

gae zamanon ki dard kajlai bhuli bisri kitab padh kar

jo ho sake tum se aane vaale dinon ke rangin khvab likhna

More Poems

Leave a Comment