Unhen dhundo

Bushra Ejaz

unhen dhundho safar ki shaam se pahle

kisi anjam se pahle

unhen dhundo

jo milne ki ghadi men

ham se bichhde the

dilon se phutte is gham se bichhde the

jo ankhen khushk rakhta hai

magar dahliz-e-jan tak

paniyon ko chhod jaata hai

jo rasta dil ki galiyon se nikalta ho

usi raste ki har ik samt ko

vo mod jaata hai

masarrat ki hari shakhon ko aa kar tod jaata hai

unhen dhundo

udasi ki kitabon se

tamanna ke nisabon men likhi

tahrir ke mafhum se

jis men udasi ne

khud apni bebasi ka baab likkha tha

shuur-e-zat ka

dhundla sa ik ehsas likkha tha

unhen dhundo

judai ki gali men

laut aane ka sandesa chhod kar

rukhsat hue the jo

charaghon ne jinhen

is akhiri saaat men dekha tha

ki jab un ki laven bujhne lagi thiin

aur jab khud men mukammal ho rahe the

unhen dhundo jo ankhon se

faqat ik khvab ki

duuri pe rahte hain

jinhen ankhen

hazaron saal ki furqat ko

odhe dhundti hain

hamesha jagti hain