did-e-gulzar-e-jahan kyuun na karen sair to hai
ek din jante hain ḳhatma-bilḳhair to hai
‘rind’ vaa.iz se abas karte ho shar ḳhair to hai
donon ghar ek hain ka.aba na sahi dair to hai
ḳhosha-chin banta hai kyuun mazra-e-har-dahqan ka
vasf-e-insan nahin ye sifat-e-tair to hai
na basar hovegi be-nashsha qadah-ḳhvaron ki
ho agar mai ki munadi hai falak sair to hai
ashna bahr-e-mohabbat ke shanavar hain sab
tu bhi us aag ke dariya ko agar pair to hai
rind-o-va.iz ke bakheḌon men bhala kaun paḌe
sab ko ma.alum hai in donon men ik bair to hai
murgh-e-dil mardum-e-bimar pe sadqa kar Daal
vaste sehhat-e-jan ke amal-e-tair to hai
jaise uḌti si suni hai ḳhabar-e-qatl-e-safir
puchhta phirta huun ik ek se kyuun ḳhair to hai
saqiya chand ghaḌe mai ke qadah-ḳhvaron men
sarf lillah agar hon amal-e-ḳhair to hai
dar-guzar hota hai aur hoga ba-qadr-e-imkan
aḳhir-e-kar ye pa-posh-o-sar-e-ghair to hai
kah liye ‘rind’ ne sab qafiye koi na chhuTa
angrezi magar ik qafiya-e-fair to hai
Leave a Reply