Na Puchh Ai Ham-Nafas Afsana-e-Ranj-O-Mehan Mera

Sufi

na puchh ai ham-nafas afsana-e-ranj-o-mehan mera

na hai bas men zaban meri na qaabu men dahan mera

shamim-e-zulf ne mahka diya dil ka har ik gosha

jo bikhrin yaar ki zulfen bana pallu khutan mera

sata le jitna ji chahe magar itna samajh rakhna

rasa hoga kabhi to naala ai charkh-e-kuhan mera

na daman hi salamat hai na jeb-o-astin baaqi

hua hai nazr-e-khar-e-dasht saara pairahan mera

hare phir kar diye zakhm-e-jigar abr-e-baharan ne

hua shadab do chhinton men ye ujda chaman mera

vo kahte hain kaho jo kuchh tumhen kahna ho ai ‘kaifi’

magar taqat kahan se laae kahne ki dahan mera