Poet
arzu-e-dil-e-nakam se Dar lagta hai
zindagani tire paigham se Dar lagta hai
phir kisi jazba-e-gum-nam se Dar lagta hai
husn-e-ma.asum pe ilzam se Dar lagta hai
shisha-e-dil pe koi Thes na lagne paa.e
talḳhi-e-mai se nahin jaam se Dar lagta hai
jis ko aghaz-e-mohabbat ka nahin hai ehsas
bas use ishq ke anjam se Dar lagta hai
vaqt ke saath badal jaati hain qadren hamdam
rah-e-pur-ḳhar men aram se Dar lagta hai
jis ne tufan-e-bala-ḳhez ka munh toḌ diya
kyuun use gardish-e-ayyam se Dar lagta hai
dekh kar qasr-e-tamanna ki tabahi shayad
gulshan-e-dil ke dar-o-bam se Dar lagta hai
mehr-e-taban ki qasam gesu-e-janan ki qasam
sub.h-e-nau tujh se nahin shaam se Dar lagta hai
sirf allah se Darti hai ‘aziz’-e-ḳhasta
kya use talḳhi-e-ayyam se Dar lagta hai
Leave a Reply