ghamon se hijr ke kuchh aise bad-havas rahe
vo mil ga.e bhi to ham der tak udaas rahe
ye anjuman to sitam ko sitam hi samjhegi
tira karam ki hamin-ham ada-shanas rahe
vo chak-damani-e-gul ka raaz kya janen
bhari bahar men jo ḳhaar be-libas rahe
junun hai ek jasarat junun hai ek tarang
ḳhirad nahin ki asir-e-umid-o-yas rahe
na TuTna tha na TuuTa ghurur-e-gumrahi
pahunch ga.e bhi to manzil ke as-pas rahe
nigah tak to uTha di kisi ne jaam ke saath
jo phir bhi rahti hai ‘ḳhavar’ to apni pyaas rahe
Leave a Reply