kuchh na kiya arbab-e-junun ne phir bhi itna kaam kiya
dar-ba-dar uftad se khele zulf-ba-zulf aram kiya
savan shoale bhadke gulshan gulshan aag lagi
kaisa suraj ubhra jis ne sub.h ko atish-nam kiya
tanhai bhi sannate bhi dil ko Daste jaate hain
rahgiro kis des men aa kar ham ne aaj qayam kiya
qarya-e-gul se dasht-e-bala tak ahl-e-havas ki yurish thi
kuchh to samajh kar divanon ne tark-e-jada-e-am kiya
raat ke hathon kab tak rahta shahr-e-nigaran tira-o-tar
apne lahu se ham ne charaghan akhir gam-ba-gam kiya
aish bhi guzre ranj bhi guzre dil ki halat ek rahi
kab jashn-e-aghaz manaya kab khauf-e-anjam kiya
‘mir’ ke gyani lakhon dekhe ‘mir’ si kis men baat ‘uruj’
meri biiti aap ne kah len khud ko abas badnam kiya