bada-e-gul ko sab andoh-ruba kahte hain
ashk-e-gul rang men Dhal jaa.e to kya kahte hain
fursat-e-bazm bhi malum ki arbab-e-nazar
shola-e-sham.a ko ham dosh-e-saba kahte hain
ye musalsal tira paiman tiri paiman-shikani
ham ise hasil-e-paiman-e-vafa kahte hain
qasr-e-azadi-e-insan hi sahi mai-ḳhana
dar-e-mai-ḳhana ki zanjir ko kya kahte hain
ye rah-e-gham ke ḳham-o-pech ajab hain jin ko
ḳhush-nazar saya-e-gesu-e-rasa kahte hain
ishq ḳhud apni jagah maz.har-e-anvar-e-ḳhuda
aql is soch men gum kis ko ḳhuda kahte hain
koi kis dil se bhala un ka bura chahega
jo bhale log buron ko bhi bhala kahte hain
dil-nashin tere siva koi nahin koi nahin
kaun hain vo jo tujhe dil se juda kahte hain
yahi divana jo phulon se bhi katrata hai
kya isi ko ‘ravish’-e-abla-pa kahte hain
Leave a Reply