Qamar Siddiqi
hamari niind men koi sarab-e-ḳhvab bhi nahin
ye kaisa regzar hai fareb-e-ab bhi nahin
the kaise kaise log mere ḳhema-e-ḳhayal men
ga.e dinon ki ḳhair ho ki ab tanab bhi nahin
ye hadisa ki barf-bariyon ki zad pe aa ga.e
magar ye vaqi.a lahu men koi taab bhi nahin
na kuchh gila na iltifat-e-hijr ki siyah raat
faramushi ka daur hai ki ab azaab bhi nahin
ye lamha lamha zindagi kuchh is tarah se kaT ga.i
kahan pe ḳharch kya hua koi hisab bhi nahin
Leave a Reply