sab pe tu mehrban hai pyare
kuchh hamara bhi dhyan hai pyare
aa ki tujh bin bahut dinon se ye dil
ek suuna makan hai pyare
tu jahan naaz se qadam rakh de
vo zamin asman hai pyare
muḳhtasar hai ye shauq ki rudad
har nafas dastan hai pyare
apne ji men zara to kar insaf
kab se na-mehrban hai pyare
sabr TuuTe hue dilon ka na le
tu yunhi dhaan paan hai pyare
ham se jo ho saka so kar guzre
ab tira imtihan hai pyare
mujh men tujh men to koi farq nahin
ishq kyuun darmiyan hai pyare
kya kahe hal-e-dil gharib ‘jigar’
TuuTi phuTi zaban hai pyare
Leave a Reply