Shahnaz Parveen Sahar
mujh se luknat hui aur baat sanbhali us ne
bas kabhi dekhi nahin aankh ki laali us ne
vo gale milta hai malbus bacha kar apna
zindagi kaisi kalaf-dar bana li us ne
ajnabi samt men parvaz-e-tajassus us ka
dam-ba-ḳhud ghar se alag jhok basa li us ne
itna madum hua vo ki nazar se bichhḌa
lams ki yaad bhi poron se uTha li us ne
jism ke paar miri ruuh talak sannaTa
hijr ki raakh men miTTi miri Dhali us ne
mom-batti ke muqabil men biTha kar us ko
khinch li phir koi tasvir misali us ne
munkashif ho gaya ik aur mohazzab lamha
ḳhud jala kar bhi miri raakh sanbhali us ne
main sama.at ka hunar bhuul hi ja.un na ‘sahar’
chhu ke dekhi hai mire kaan ki baali us ne
Leave a Reply