Talab Ke Tale

Noon Meem Rashid

gul-o-yasman kal se na-ashna

kal se be-e’tina

gul-o-yasman apne jismon ki haiat men fard

magar kal se na-ashna kal se be-e’tina

kasi marg-e-mubram ka dard

un ke dil men nahin!

faqat apni tarikh ki be-sar-o-pa talab ke tale

ham dabe hain!

ham apne vajudon ki pinhan tahen

kholte tak nahin

aarzu bolte tak nahin!

ye tarikh meri nahin aur teri nahin

ye tarikh hai izhdiham-e-ravan

usi izhdiham-e-ravan ki ye tarikh hai

ye vo chikh hai

jis ki takrar apne man-o-tu men hai

vo takrar jo apni tahzib ki hu men hai

tujhe is pe hairat nahin

ham is izhdiham-e-ravan ke nishan-e-qadam par chale ja rahe hain

badhe ja rahe hain

ki ham zulmat-e-shab men tanha

pade rah na jaaen

badhe ja rahe hain

na jiine ki khatir

na is se fuzun zinda rahne ki khatir

badhe ja rahe hain kisi aib se

rahzan-e-marg se bach nikalne ki khatir

judai ki khatir!

kisi fard ke khauf se badh rahe hain

jo batin ke tuute darichon ke pichhe

shararat se hansta chala ja raha hai