Kam Se Kam Aarzi Nahin Hogi

Ali Qaisar

kam se kam aarzi nahin hogi

maut itni buri nahin hogi

itni chhoTi hai ka.enat mujhe

khul ke avargi nahin hogi

diin men jabr ko rava rakhna

maz.habi ḳhud-kushi nahin hogi

sab pe tanqis kar raha hai vo

us se ab sha.iri nahin hogi

hifz kar lunga main badan us ka

jeb men diary nahin hogi

sab tamanna.en puuri karni hain

tu bata kaun si nahin hogi

sab ko sab kuchh milega jannat men

bas vahan zindagi nahin hogi

ab jo chamkegi dekh kar us ko

bhuuk vo jism ki nahin hogi

vaqt muTThi men hoga tab tire paas

haath par jab ghaḌi nahin hogi

kah diya naan vo mera maazi tha

is pe ab baat bhi nahin hogi

jhiil ki dastan ḳhatm hui

chand hoga pari nahin hogi