Abu-Lahab Ki Shadi

Noon Meem Rashid

shab-e-zafaf-e-abu-lahab thi magar khudaya vo kaisi shab thi

abu-lahab ki dulhan jab aai to sar pe indhan gale men

sanpon ke haar laai na us ko mashshatgi se matlab

na maang ghaza na rang roghan gale men sanpon

ke haar us ke to sar pe indhan

khudaya kaisi shab-e-zafaf-e-abu-lahab thi

ye dekhte hi hujum biphra bhadak uthe yuun ghazab

ki shole ke jaise nange badan pe jabir ke taziyane

javan ladkon ki taliyan thi na sehan men shokh

ladkiyon ke thirakte paanv thirak rahe the

na naghma baaqi na shadyane

abu-lahab ne ye rang dekha lagam thami lagai

mahmez abu-lahab ki khabar na aai

abu-lahab ki khabar jo aai to sal-ha-sal ka zamana

ghubar ban kar bikhar chuka tha

abu-lahab ajnabi zaminon ke laal o gauhar samet kar

phir vatan ko lauta hazar tarrar o tez ankhen purane

ghurfon se jhank utthin hujum piir o javan ka

gahra hujum apne gharon se nikla abu-lahab ke julus

ko dekhne ko lapka

abu-lahab ik shab-e-zafaf-e-abu-lahab ka jala

phaphula khayal ki ret ka bagula vo ishq-e-barbad

ka heyula hujum men se pukar utthi abu-lahab

tu vahi hai jis ki dulhan jab aai to sar pe indhan

gale men sanpon ke haar laai

abu-lahab ek lamha thithka lagam thami lagai

mahmez abu-lahab ki khabar na aai