ajiib shaḳhs hai mujh ko to vo divana lage
pukarta huun to us ko miri sada na lage
guzar raha hai mire sar se jo hava ki tarah
kabhi kabhi to vahi lamha ik zamana lage
gali men jis pe har ik samt se chale patthar
mujhe vo shaḳhs kisi tarah bhi bura na lage
mizaj us ne bhi kaisa ajiib paaya hai
hazar chheḌ karun par use bura na lage
hamare pichhe vo chup-chap baiTha rahta hai
main sochta huun magar kuchh mujhe pata na lage
isi ḳhayal se shayad hai band vo khiḌki
ThaThurti shaam ki us ko kahin hava na lage
suna.en kis ko yahan ap-biti ai ‘aslam’
hamen to apni hi har baat ḳhud fasana lage
Leave a Reply