kaash mil jaa.e mire dil ko mohabbat teri
mujh ko har shai se ziyada hai zarurat teri
itni ujlat men na kar umr ke va.ade mujh se
do ghaḌi baiTh ki main dekh luun surat teri
chahe jitna bhi tu chhup jaa.e miri nazron se
main ne har ek men dekhi hai shabahat teri
ai mohabbat na mila mujh ko sila tujh se koi
farz kar li hai magar ḳhud pe ibadat teri
chahe jo maang le mujh se hai sabhi kuchh tera
ye miri jaan ye mira dil hai amanat teri
Leave a Reply