Masud Husain Khan
hazar baar use nakamiyon ne samjhaya
magar ye dil tiri ulfat se baaz kab aaya
vahi lagan hai ki chaliye jahan kahin tu ho
vahi chubhan ki mohabbat se ham ne kya paaya
khulega raaz ki anchal ki kya haqiqat hai
kabhi jo sar se mohabbat ke ye Dhalak aaya
gulon ke ghaav bhi shabnam se dhul sake hain kabhi
ki ashk ne mire zaḳhmon ko aur mahkaya
vo kya maqam hai daman ki aarzu men nadim
jahan pe dast-e-tamanna bhi ja ke tharraya
yahan bahar na jan-e-bahar hai ‘mas.ud’
kahan se turfa ghazal aaj phir ye kah laaya
Leave a Reply