Atif Tauqeer
ḳhamoshi ke dar-parda mahsus kiya
teri ankhon ko apna jasus kiya
ham par to ik ishq ki aafat utri thi
divar-o-dar ko kis ne manhus kiya
chaukhaT par baiTha hai kis ḳhamoshi se
darvaze ko dastak ne manus kiya
tere hijr ka chaqu yuun to kaari tha
lekin zaḳhmon ne kitna mayus kiya
tu ne ḳhat men phuul bana kar bheja tha
main ne muddat ḳhushbu ko mahsus kiya
ḳhvab ke sikke kitne kam hain kaase men
niind ko kis ne is had tak kanjus kiya
Leave a Reply