hosh-o-ḳhirad men aag laga di ḳhirman-e-kaif-o-kam ko jalaya
sho.ala bane aur siine se lipTe aap jale aur ham ko jalaya
jis ko kahen ghar-phunk tamasha bas vo tamasha aap ne dekha
aap ki bijli ḳhush hai ki us ne musht-e-ḳhas-e-adam ko jalaya
ghair ko jhiḌki ham pe inayat ho ga.i aḳhir jaan ko aafat
bazm-e-azal men tum ne bula kar kis liye na-mahram ko jalaya
zindagi apni yas-o-tamanna aag pe aag aur sho.ale pe sho.ala
dil ko hamare gham se jala kar sho.ala-e-ruḳh se gham ko jalaya
kaisi jalan thi kaisi jalan hai jal chuke phir bhi jal nahin chukte
kaash koi yuun tum ko jala de jaise ki tum ne ham ko jalaya
aag hai bijli aag hain zarre aag hai suraj aag hain taare
ham ne na ki thi shoḳh-nigahi aap ne kyon aalam ko jalaya
Leave a Reply