Tajassus Kahe Ka Kya Ho Gaya Hai

tajassus kaahe kā kyā ho gayā hai

vo bichhḌā kab hai tujh meñ kho gayā hai

vahī ik shaḳhs jo kuchh bhī nahīñ thā

mujhe apnā ke sab kuchh ho gayā hai

chhaTā to kyā hai tere ġham kā bādal

baras kar aur gahrā ho gayā hai

mohabbat meñ to rāteñ jāgtī haiñ

koī kuchh soch kar hī so gayā hai

vo itne sañg-dil pahle kahāñ the

mirā milnā qayāmat ho gayā hai

mujhe be-maut ab marnā paḌegā

sunā hai koī merā ho gayā hai

ġhazal kah kar ġham-e-jānāñ se ‘anjum’

ta.alluq aur gahrā ho gayā hai

Leave a Comment