tajassus kaahe ka kya ho gaya hai
vo bichhḌa kab hai tujh men kho gaya hai
vahi ik shaḳhs jo kuchh bhi nahin tha
mujhe apna ke sab kuchh ho gaya hai
chhaTa to kya hai tere gham ka badal
baras kar aur gahra ho gaya hai
mohabbat men to raten jagti hain
koi kuchh soch kar hi so gaya hai
vo itne sang-dil pahle kahan the
mira milna qayamat ho gaya hai
mujhe be-maut ab marna paḌega
suna hai koi mera ho gaya hai
ghazal kah kar gham-e-janan se ‘anjum’
ta.alluq aur gahra ho gaya hai
Leave a Reply