Andaz Kuchh Aur Naz-O-Ada Aur Hi Kuchh Hai

andaz kuchh aur naz-o-ada aur hi kuchh hai

jo baat hai vo nam-e-khuda aur hi kuchh hai

na barq na khurshid na shoala na bhabhuka

kyuun sahibo ye husn hai ya aur hi kuchh hai

billor ki chamken hain na almas ki jhamken

us gore se siine ki safa aur hi kuchh hai

pichhe ko nazar ki to vo guddi hai qayamat

aage ko jo dekha to gila aur hi kuchh hai

siine pe kaha main ne ye do seb hain kya hain

sharma ke ye chupke se kaha aur hi kuchh hai

tum baten hamen kahte ho aur sunte hain ham chup

apni bhi khamoshi men sada aur hi kuchh hai

hain aap ki baten to shakar-rez par ai jaan

is gunge ke gud men bhi maza aur hi kuchh hai

puchhi jo dava ham ne tabibon se to bole

bimari nahin hai ye bala aur hi kuchh hai

unnab na khutmi na banafsha na khiyarin

is Dhab ke marizon ki dava aur hi kuchh hai

ham ko to ‘nazir’ un se shikayat hai jafa ki

aur un ka jo suniye to gila aur hi kuchh hai

Leave a Comment