Kab Lazzaton Ne Zehn Ka Pichha Nahin Kiya

Anwar Anjum

kab lazzaton ne zehn ka pichha nahin kiya

ye mera hausla tha ki lab va nahin kiya

vo kam-nigah tha magar us se chura ke aankh

main ne bhi apne saath kuchh achchha nahin kiya

tajdid-e-irtibat bhi mumkin thi ba.ad men

main ne hi us ravish ko gavara nahin kiya

pahle to ik junun sa arz-e-talab ka tha

jab vo mila to dil ne taqaza nahin kiya

suraj raha jo din men mire ghar se duur duur

phir main ne raat men bhi ujala nahin kiya

kya vahm tha ki khulte hi lab band ho ga.e

kya baat thi ki lafz bhi puura nahin kiya

main ne bhi chalte chalte yunhi kar diya saval

kya ho gaya jo aap ne puura nahin kiya

main sada-lauh sada-bayan sada-arzu

aur us ne sadgi pe bharosa nahin kiya

jab mera ishtiyaq hua zabt-azma

phir us ne apne-ap hi parda nahin kiya

amrit samajh ke pi liya ‘anjum’ ne zahr-e-gham

lekin tumhare naam ko rusva nahin kiya