sheikh-ibrahim-zauq

Gain Yaron Se Wo Agli Mulaqaton Ki Sab Rasmein

gaiin yaron se vo agli mulaqaton ki sab rasmen

pada jis din se dil bas men tire aur dil ke ham bas men

kabhi milna kabhi rahna alag manind mizhgan ke

tamasha kaj-sirishton ka hai kuchh ikhlas ke bas men

tavaqqo kya ho jiine ki tire bimar-e-hijran ke

na jumbish nabz men jis ki na garmi jis ke malmas men

dikhae chira-dasti aah baladast gar apni

to maare haath daman-e-qayamat charkh-e-atlas men

jo hai gosha-nashin tere khayal-e-mast-e-abru men

vo hai bait-us-sanam men bhi to hai baitul-muqaddas men

kare lab-ashna harf-e-shikayat se kahan ye dam

tire mahzun-e-be-dam men tire maftun-e-bekas men

hava-e-ku-e-janan le ude us ko taajjub kya

tan-e-laghar men hai jaan is tarah jis tarah bu khas men

mujhe ho kis tarah qaul-o-qasam ka e’tibar un ke

hazaron de chuke vo qaul lakhon kha chuke qasmen

hue sab jama mazmun ‘zauq’ divan-e-do-alam ke

havas-e-khamsa hain insan ke vo band-e-mukhammas men

More Poems

Leave a Comment