shab ke hathon gira aur kahin rah gaya
chand phir be-falak be-zamin rah gaya
chalte rahte to milne ka imkan tha
jo jahan ruk gaya vo vahin rah gaya
ḳhud ko kho.e hue kya kise DhunDte
tum kahin rah ga.e main kahin rah gaya
kaun rakkhe hisab-e-shab-o-roz jab
shab kahin rah ga.i din kahin rah gaya
kho gaya jo bhi zad-e-safar paas tha
ḳhvab oḌhe hue ik yaqin rah gaya
tum mile hi kahan milne jaise mujhe
main jahan tha vahin ka vahin rah gaya
sab guzarta gaya sab guzarne diya
phir bhi kya kya na dal ke qarin rah gaya
main uTha.e hue ye badan chal paḌa
dil bhi raazi tha phir bhi vahin rah gaya
ba.ad muddat ke ab sochna bhi hai kya
paas kya rah gaya kya nahin rah gaya
Leave a Reply