Hamare Beach Agarche Raha Nahin Kuchh Bhi

Abrar Ahmad

hamare beach agarche raha nahin kuchh bhi

magar ye dil hai abhi manta nahin kuchh bhi

ham us ke gham ko in ankhon men le ke phirte hain

magar vo shakhs hamen janta nahin kuchh bhi

ye kaisi dhuul si rahon men udti phirti hai

tu ai musafir-e-jan kya bacha nahin kuchh bhi

ham apne apne dil-o-jan ki khair mangte hain

ye ijz kuchh bhi nahin hai ana nahin kuchh bhi

bas ek manzar-e-khali main uungh leta huun

vo khush-nazar hai magar dekhta nahin kuchh bhi

tu bol uthta hai ham ko bhala bhi lagta hai

magar tu yaar mire sochta nahin kuchh bhi

kahin pe ho ki na ho izzat-e-gunah-garan

magar yahan koi tere siva nahin kuchh bhi

guman to khair mohabbat ka tha par ab is se

ba-su-e-ranj-talab vasta nahin kuchh bhi

hamare haal pe tum ko malal tak bhi nahin

to kya jo rabt hamara thaa, tha nahin kuchh bhi

kabhi jo aao to ham ko jo tum se kahni hai

yunhi si baat hai ab muddaa nahin kuchh bhi