Ataul Hasan
vaise to is ghar ko us ne chahe kam ḳhush-hali di
beTa bar-ḳhurdar diya aur beTi hausle vaali di
ghusse men donon ne ik duuje ke haath ko jhaTka tha
aur ab soch rahe hain pahle kis ne kis ko gaali di
kuchh main ḳhud bhi har ik shaḳhs ki baton men aa jaata huun
kuchh vaise bhi us ne mujh ko surat bholi-bhali di
varna kaam tha mera to phulon se rizq kamane tak
phir us ne ik baagh ki mere hathon men rakhvali di
dhuup baḌhi to vo bhi apne apne paanv khinch ga.e
main ne apne hisse ki jin peḌon ko hariyali di
dil ne meri ek sada par donon hathon daan kiya
jab zambil mohabbat ne jazbat se mujh ko ḳhali di
tu bhi maan gaya ai dost ki dariya sirf Dubota hai
mere baare men duniya ne tujh ko ḳham-ḳhayali di
pahle meri ankhon se sarmaya chhina nindon ka
badle men phir hijr ne meri ankhon ko ye laali di
vo hi dega mujh ko phir ta.amir uThane ki himmat
jis ne ‘hasan’ in bam-o-dar ko itni ḳhasta-hali di
Leave a Reply