is qadar bhi dukhi nahin the ham
jaise ab hain kabhi nahin the ham
dusra us ko mil gaya koi
aḳhiri aadmi nahin the ham
har zarurat ki ek qimat thi
aur itne dhani nahin the ham
kaise chahat kisi ko de dete
yaar itne saḳhi nahin the ham
kaise daman bachate duniya se
aadmi muttaqi nahin the ham
jo tasavvur tha us ke ḳhvabon men
hu-ba-hu kya vahi nahin the ham
ab to ‘mashkur’ aisa lagta hai
tere dil men kabhi nahin the ham
Leave a Reply