Poet
tanur-e-vaqt ki hiddat se Dar ga.e ham bhi
magar tapish men tape to nikhar ga.e ham bhi
jahan pahunch ke musafir ke ruḳh badalte hain
rah-e-hayat ke us moḌ par ga.e ham bhi
jala diya tha safina utar ke sahil par
junun-e-fat.h men kya kya na kar ga.e ham bhi
jadid rang se maddham hua na rang-e-kuhan
qadim rang men vo rang bhar ga.e ham bhi
qadam qadam pe sitam sah ke ji rahe the jise
usi hayat ki banhon men mar ga.e ham bhi
na kuchh junun-e-tajassus ka puchhiye aalam
kahan kahan se na ‘kausar’ guzar ga.e ham bhi
Leave a Reply