vahshat men nikal aaya huun idrak se aage
ab DhunDh mujhe majma-e-ushshaq se aage
ik surḳh samundar men tira zikr bahut hai
ai shaḳhs guzar dida-e-namnak se aage
us paar se aata koi dekhun to ye puchhun
aflak se pichhe huun ki aflak se aage
dam toḌ na de ab kahin ḳhvahish ki hava bhi
ye ḳhaak to uḌti nahin ḳhashak se aage
jo naqsh ubhare the miTa.e bhi hain us ne
darpesh phir ik chaak hai is chaak se aage
a.ine ko toḌa hai to malum hua hai
guzra huun kisi dasht-e-ḳhatarnak se aage
ham-zad ki surat hai mire yaar ki surat
main kaise nikal sakta huun chalak se aage
Leave a Reply