afroz-alam

Be-Qarari

rafta rafta ashk ankhon se ravan hone lage

dil laga kar duur mujh se jaan jaan hone lage

aankh un se jab mili to mil gaya dil ko qarar

chand-taron men kiya karta tha main un ka shumar

dil ki dhadkan meri uljhan be-zaban hone lage

rafta rafta ashk ankhon se ravan hone lage

vo sunahra harf tha uljhi hui tahrir ka

main musavvir tha kisi bikhri hui tasvir ka

dhire dhire pyaar men donon javan hone lage

rafta rafta ashk ankhon se ravan hone lage

barf ka mausam tha phir bhi aag men jalte the ham

raah men kante the phir bhi shauq se chalte the ham

aaj ham ik bhuli-bisri dastan hone lage

rafta rafta ashk ankhon se ravan hone lage

More Poems

Leave a Comment