gulon si guftugu karen qayamaton ke darmiyan
ham aise log ab milen hikayaton ke darmiyan
lahuluhan ungliyan hain aur chup khadi huun main
gul o saman ki be-panah chahaton ke darmiyan
hatheliyon ki ot hi charagh le chalun abhi
abhi sahar ka zikr hai rivayaton ke darmiyan
jo dil men thi nigah si nigah men kiran si thi
vo dastan ulajh gai vazahaton ke darmiyan
sahifa-e-hayat men jahan jahan likhi gai
likhi gai hadis-e-jan jarahaton ke darmiyan
koi nagar koi gali shajar ki chhanv hi sahi
ye zindagi na kat sake masafaton ke darmiyan
ab us ke khal-o-khad ka rang mujh se puchhna abas
nigah jhapak jhapak gai iradaton ke darmiyan
saba ka haath thaam kar ‘ada’ na chal sakogi tum
tamam umr khvab khvab saaton ke darmiyan
Leave a Reply